Transcription
1
Reçue à Grenoble, le 06 mars 1573. Répondue le 07 mars 1573.
2
Monsieur, yer je resseus les vostres du IIII de
3
par là que vous diligentés plus que vous
4
nadvoyt acostumé à me les fère tenir et despuys
5
la despêche que je vous fis au IIIe, l’anemy
6
cest saysy de Vileneufve de Berc, quoy voyant
7
monsieur de Laugières qui estoyt dedens, c’est
8
retiré à ungne mayson, laquelle va sur les
9
murailhes de la vile près de l’ugne des portes et
10
tient encores là dedens et monsieur de Montaut
11
tient l’eglise qui respont à la mayson. Monsieur
12
du Telh m’est venu trouver pour advoyr de jens
13
pour le secourir. Je luy ay forny cent arquebusiers
14
et aveques les aultres en nombre de cinq hou
15
six centz qu’il a d’alhieurs, il est party pour voyr
16
s’il i a moyen de le saulver. Mays je me doute fort
17
que le secours sera trop tart et vous direy que
18
toutes ses execussions se font par tractimens des
19
catholisés qui mest ungne grand jalouzie par
20
tout sabbas. Ces jours passés, tous leurs chefz
21
delà le Rosne se sont assemblés à Privas pour
22
pourvoyr et deliberer de leurs affères. Ilz hont esleu
23
le Poyet pour comander au bas Viverès et Saincte Greve
24
pour le ault. Ilz metent les Inpos et font levées
25
de denrees et n’oblient rien de l’autorité qu’ilz hont
26
[231v°] à ce que j’ay peu antandre par gens que je y ay
27
anvoyé. Leur dessayn est d’aller secourir Nismes sy
28
l’on l’ataque et d’avoyr ung passage sur le Rosne
29
pour houvrir le chemin à ceulx de ce cousté
30
et pour cette hocasion vouloyent passer au Pousin
31
et fère ung fort comme l’autrefoys je m’y suis opposé
32
et ay lougé la compagnie du cappitaine Araret aux
33
Granges plus près du Rosne et faict venir la compagnie
34
du seigneur Sainturion en ce lieu de Lauriol hoù
35
nous raffrachissons le jour et la nuyt aux
36
Granges hoù ayant veu et antandu nostre fasson
37
ilz n’ont despuys fet semblant de passer. Je ne
38
sey sy vous envoyés la compagnie de monsieur Maulgeron
39
en Languedoc. Il me semble qu’il seroyt nyssessayre
40
l’arrester yssy pour le moyns jusques que la vostre y fut et pour
41
beaucoup de raysons elle est à ce soyr à Chabeulh.
42
Vous m’en envoyrés s’il vous playt votre voulonté.
43
Quant à Sommière, ons la batue d’ung aultre cousté.
44
Monsieur le mareschal est resolu de n’en partir qu’il
45
ne l’aye bien tost. L’on verra ce qu’il en porra
46
estre, de quoy je vous dirrey et de toutes choses
47
proutent[prudent ?] advis. Je vous envoye ung paquet de
48
monsieur La Roche, lequel desire comme il m’escript
49
bien tost la response. Je vous envoye ungne lettre de
50
monsieur de Vyvyiers[ ?] par laquelle verrés comme ilz sont
51
audits Baronies. Je vous supplie monsieur fère anvoyer
52
[232] ung comissayre pour les vivres. Et atandent
53
de vous nouvelles, je prirrey Notre Seigneur vous doner,
54
monsieur en parfaicte prosperité, très heureuse
55
et très bonne vie et longue. De Lauriol, ce
56
Ve de mars 1573
57
Vostre très humble serviteur
58
Rousset